Затрыманы Аляксей Туровіч (абноўлена)
Сёння, 4 ліпеня, каля 14.00 быў затрыманы Аляксей Туровіч.
Затрыманне праводзілі асобы ў цывільным. Машына, у якой ехаў спадар Туровіч, была спыненая. З ужываннем фізічнай сілы актывіст быў затрыманы і звезены ў невядомым кірунку.
Як стала вядома Радыё Свабода, суд над Аляксеям Туровічам адбыўся ў судзе Менскага раёну. Абвінавацілі Туровіча па артыкулах 17.1 («Хуліганства») і 23.34 ч. 1 («Удзел у несанкцыянаваным масавым мерапрыемстве»). Гэта тычыцца падзеяў 6, 7 і 9 чэрвеня каля рэстарана «Поедем поедим».
У пратаколах гаворыцца, што Туровіч 7 чэрвеня ўступіў у бойку з грамадзянінам С. (супрацоўнікам рэстарана. — РС); 6 чэрвеня парушыў парадак правядзеньня пікетаваньня; 9 чэрвеня наўмысна перашкаджаў праходу наведнікаў і праезду транспарту на тэрыторыю рэстарана, патрабаваў закрыць рэстаран.
Туровіч віны не прызнаў. Засьведчыў, што 7 чэрвеня супрацоўнік рэстарана напаў на людзей, якія абараняюць Курапаты, парваў буклеты з інфармацыяй, у тым ліку ўдарыў Туровіча. Праезду транспарту, паводле рэжысэра, ён перашкаджаў, але не замінаў людзям праходзіць пешкі.
У якасьці доказаў у судзе былі прагледжаныя відэазапісы, аднак відэафіксацыі магчымай бойкі паміж Туровічам і супрацоўнікам рэстарана ў судзе не паказалі.
