Рэзалюцыя Дня Волі ў Менску (фота)
Прадстаўляем вашай увазе тэкст рэзалюцыі, прынятай падчас святкавання Дня Волі ў Менску 24 сакавіка.
101 год таму айцы-заснавальнікі Беларускай Народнай Рэспублікі зрабілі першы крок да адраджэння незалежнасці нашай краіны. Праз стварэнне БНР і аб’яўленне незалежнасці беларускі народ выказаў сваю волю аб стварэнні ўласнай дзяржавы, беларусы заявілі аб сваім праве ЛЮДЗЬМІ ЗВАЦЦА!
Але сёння, як 101 год таму над Беларуссю – пагроза страты незалежнасці.
Аўтарытарная сістэма кіравання стварае глебу для карупцыі і бяспраўя, робяць нашу краіну слабой і ўразлівай перад знешнімі пагрозамі. Адсутнасць справядлівых судоў і сумленных выбараў пазбаўляюць грамадзян нашай краіны на годнае жыццё.
Мы заяўляем аб тым, што толькі беларускі народ з’яўляецца адзіным надзейным гарантам незалежнасці.
Мы патрабуем свабоды і павагі для кожнага беларуса, незалежнасці для Беларусі.
Патрабуем рэформы судовай сістэмы дзеля абароны грамадзян ад карупцыі і беззаконня, правядзення свабодных выбараў, рэальнага раўнапраўя беларускай і рускай моў, забеспячэння права працоўных на годныя заробкі, пенсіянераў – на годнае жыццё, патрабуем гарантыі абароны маёмасці грамадзян і прыватнага бізнесу. Патрабуем выхаду Беларусі з АДКБ і з дамовы аб “саюзнай дзяржаве”.
Мы заклікаем ўсіх тых, каму дарагая незалежнасць нашай радзімы, хто любіць Беларусь далучыцца да кампаніі “Наш Сцяг! наша Мова! наша Незалежнасць!”
Толькі разам мы абаронім нашу Бацькаўшчыну- Маці Беларусь! Разам мы пераможам! Жыве Беларусь!
Прынята 24 скавіка 2019. Дзень Волі
Фота Надзеі Гацак, Krynica.infoі Telegraf.by
